اقتراح لتكوين فريق اكتساب مهارات

من الاول كده مش عايز حد يتضايق من طول الموضوع
بس لازم اوضح كل حاجة عشان نبقى على نور
ههههههههه

انا صراحة جاتلى دلوقتى حالا
وقعدت افكر فيها ووجدت انى محتاج مساعدة كبيرة جدا فقررت انى لازم اعرضها على حد
يشاركنى فيها ويساعدنى
بصراحة انا فكرت فى اماكن كتير اوى اعرض فيها الفكرة
ولكنى عايز مكان واحد بس تطلع منه الفكرة دى و تنتشر
و كان قرارى الاخير ان الفكرة دى تتعرض هنا
وعلى اعضاء منتدى رسالة حياة
لان الفكرة دى عايزة ايجابية
ومش هلاقى مكان ايجابى ولاناس تقدر تساعدنى فيها الا هنا

اولا : أهداف الفكرة :-

تكوين فريق متعاون يمتلك مهارات عالية و متميزة فى اكثر من مجال و اكتساب كل عضو فى الفريق خبرات باقى الاعضاء بمعنى اصح نخلى فرد واحد يفكر بعقل و خبرة الف فرد

ثانيا : اسباب الفكرة :-

كتير مننا نفسه يتعلم حاجات كتير اوى ولكنه مش بيقدر و بيشوف ان الحاجة اللى عايز يتعلمها دى شئ معقد جدا و يستحيل فهمه و تعلمه و عشان كده بينازل عن امنيته
وده راجع لكذا سبب منهم :
ارتفاع تكاليف الدورات التدريبية
عدم وجود وقت فراغ
الاعتقاد بان الحاجة دى صعبة جدا و ماتتفهمش و ان اللى متعلمينها مخلوقات من كوكب اخر يمتلكوا 7 عقول و 18 ايد و 25 عين
واكثر ........

ثالثا : عوامل تكون الفكرة :-

اكتشاف ان فى حاجة اسمها مواقع تعليم مشترك
يعنى مثلا : منتدى للجرافيك الناس يشتركوا فيه ويعلموا نفسهم بنفسهم
عن طريق ان اى حد يعرف يعرف معلومة فى الجرافيك يعمل عنها موضوع عنها و يشرحها زى ماهو فاهمها
و مش محتاجة اى خبرة سابقة ولا احتراف ولا اى حاجة
لان مهما كانت المعلومة بسيطة هتفيد ناس كتير اوى وعشان تصدقوا هقولكوا مثال واحكموا بنفسكوا

مثلا واحد مايعرفش اى حاجة فى الفوتوشوب ( ده برنامج للجرافيك )
بس مع التجربة والمحاولة وصل انه سطب البرنامج على جهازه و فتحه بس مش عارف يعمل فيه اى حاجة
نزل درس او شرح عن طريقة تسطيبه ( شايف انه موضوع تافه او مالوش فايده ؟؟؟؟؟ اوك كمل وانت تعرف)
واحد تانى ماشفش ان اللى فات تافه و اتعلمه و عمل خطواته و قعد يحاول لحد ماعمل مساحة عمل جديدة وشرح طريقتها :
من قائمة File اختر New واكتب المقاسات
هو ده الشرح شايفه تافه ؟؟؟؟؟؟؟
اوك لو شايف كل ده تافه هجيبلك التقيل
مثلا هنزلك درس عن طريقة تصميم ستايل منتدى VB كامل و طريقة تركيبه على المنتدى من هيدر ل نافبار لبدى لفوتر لتصدير ملف ال XML
الخطوات :
افتح الفوتوشوب وقم بعمل مساحة عمل بمقاس 777 px فى 900 px ..............

هاه .. احتجت الموضوعين اللى فاكرهم تافهين ولا لأ ؟؟؟؟؟


طب ليه مانعملش فريق يكمل نفسه نشارك بعض بكل معلومة نملكها
الموضوع مش صعب .. و ماتفتكرش ان المعلومة اللى عندك بسيطة وماحدش هيحتاجها
عايزين نتطور بقه و نعتمد على نفسنا

ويبقى تعاملنا فى الفريق مش على اننا متعلمين و مستنين المعلم
لأ احنا معلمين و متعلمين

و مش شرط تعلم الناس ممكن تحاول تعمل حاجة و حاجة وقفت معاك أسأل و اى حد يقدر يجاوب يجاوبك سؤالك ده مش هيفيدك لوحدك ممكن حد تانى تقابله نفس مشكلتك ويعرف حلها و يتعلمها بسبب سؤالك و اعتقد ان ده عمل خير و ربنا هيجازينا عليه
و كبداية ايجابية

انا مستعد لتقديم اى معلومة جديدة اتعلمها ولو كانت غير مهمة ولكن فى مجال الكمبيوتر و بالاخص الفوتوشوب


و ياريت نقدكوا للفكرة
ورأيكوا حتى لو بالرفض

الحمد لله ان الاقتراح عجبكوا

وانشاء الله بيتاخد بجدية

و كبداية عايزين نفكر نبدأ بايه نتشارك فيه مع بعض ؟
و هنعمله فين ؟؟ هل هنا فى المنتدى فى قسم خاص ؟؟ ولا عن طريق اننا نعمل موقع او جروب يكون باسم المنتدى وربطه بالمنتدى ؟؟ ولا فى اى طريق تانية ؟

يا فندم اللي حضرتك تشوفو ؟؟؟

انت القائد يا ريس

طيب انا بقترح انها تكون جروب او قائمة بريدية
يعنى حاجة نشترك فيها و توصلنا الرسايل و المواضيع على ايميلتنا او بلوج هتبقى زى موقع و نقدر كلنا نشترك ز ننزل اللى احنا عايزينه

واعتذر عن التأخر فى الرد

جميييييييييييييل اوي على بركة الله

الاقتراح ممتاز، وأرى فيه روح الجدية والحماس من صاحب الاقتراح، واختلافي الوحيد معه هو ضرورة تكوين جروب وربطه بالمنتدى، فلماذا لا يكون في المنتدى نفسه، تيسيرا لمن يريد الاطلاع عليه من أ‘ضاء المنتدى.
وسيكون في ذلك فائدتان:
أولا: أن هذا سيكون تشجيعا لدخول المنتدى، والاطلاع على محتوياته وموضوعاته ومشاركاته، والمشاركة فيه أيضا.
ثانيا: إضافة روح التميز على منتدى دار العلوم.
وأعتقد أن هذين الفائدتين كافيتان لاتخاذ المنتدى مركزا لانطلاق هذه الفكرة.
وأبشركم وأحفزكم أيضا بأن هذه الفكرة تقريبا هي الفكرة المسيطرة على الجامعات العالمية حاليا، وهي فكرة التميز، واكتاسب المهارات.
وعن نفسي ـ إن أردتم ـ يمكنني المساعدة فيما يخص البحث العلمي، وفنون الفوتوشوب.
أخوكم محمد الطايع.

شكرا على ردك واهتمامك
و على فكرة مافيش اى اختلاف لانى كنت فعلا عايزة فى المنتدى بس خوفت يكون فيه خروج عن هدف المنتدى واختصاصه

وانا اقدر اساعد شوية فى الفوتوشوب لكنى مش محترف

وبما أننا متفقان على استحسان فكرة أن يكون المنتدى هو مقر هذه المجموعة الخاصة باكتساب المهارات، فلا يبقى إلا موافقة الأخ محمد، ومحاولة توفير قسم خاص بالمهارات، والمجموعة العاملة عليها.

<P>اقتراح تمام </P>
<P>ويلله نبدأ </P>
<P>على بركة الله</P>

اضم صوتى الى صوت الاعضاء السابقين فى استحسان الفكره ولكنى اتمنى من الاخ محمد(lifemission) انيسارع بانشاء قسم و يقوم بتسميته على سبيل المثال (قسم الدروس) وكما قال استاذى محمد الطايع من ان هذا سيجعل المنتدى مختلفا عن المنتديات و سيجعله ذو فائده على االجميع وانا فى انتظار الفكره لانتفع بها و اتمنى ان اكون قادر على الافاده
الله المستعان

وانا معاك ان يكون اسمه قسم الدروس عشان يقدر يضم كل المجالات
ولما يكبر ممكن نعمل لكل مجال نزل فيه دروس كتير موضوع يكون فهرس بالمواضيع اللى فى المجال ده بحيث يسهل على الاعضاء والزوار الوصول للى عايزينه

لماذا نصنع الفجوه بايدينا بين الجنسين
اريدكم ان تجيبونى على هذا الاستفتاء
الموجود فى قسم اقتراحات الاوضاع
وللوصول السريع استخدم ذلك الرابط
https://lifemission.yoo7.com/montada-f10/topic-t105.htm#594 واتمنى منكم الرد على الموضوع

الموضوع حلو وعجب الناس كلها مش هتبدتدي فية ولا ايه ياعمنا وقائدنا وكل الكلام الحلو اللي اتقال فوق دة

و فى حاجة كمان حصلت من قريب شجعتنى اكتر و اكتر على الفكرة دى
و هى انى كنت من قريب عايز اعرف كذا حاة ماكنتش اعرفها
فسألت ناس محترفة فيها و ماكانوش بيرضوا يطلعوا معلومة
ومنهم واحد قولتله على سؤال و قولتله فكرة و قولتله لو فكرتى غلط قولى الصح و اشرحهالى و طبعا م أخدتش منه غير التريقة و من ساعتها قررت انى مش هسأل على حاجة و هعلم نفسى
لان فى ناس بقت واخدة خبرتها و علمها احتكار و مش عارفة ان ربنا هو اللى علمها و اداها النعمة دى و ربنا قادر يشيل منهم النعمة فى ثانية

طيب يا سامر تقترح ايه قولي بس تصور وانا تحت امرك

انا اسف على اللى هقوله
ولكن انا كنت مصمم انى انفذ الفكرة دى
ولكن لم القى التفاعل هنا فى المنتدى ولم اقى الرد السريع
و الاتفاق السريع لتنفيذ الفكرة

عشان كده قررت انى هنفذ الفكرة فى منتداى عند افتتاحه مباشرة
و سيتم افتتاحه فى خلال يوم او ساعات عشان اكون خلصت التصميم بتاعه

و اعتذر عن ذلك لانى عايز انفذها فعلا
انا اسف مرة تانية و ياريت تعذرونى و تفهمونى

Samer Moustafa كتب:انا اسف على اللى هقوله
ولكن انا كنت مصمم انى انفذ الفكرة دى
ولكن لم القى التفاعل هنا فى المنتدى ولم اقى الرد السريع
و الاتفاق السريع لتنفيذ الفكرة

عشان كده قررت انى هنفذ الفكرة فى منتداى عند افتتاحه مباشرة
و سيتم افتتاحه فى خلال يوم او ساعات عشان اكون خلصت التصميم بتاعه

و اعتذر عن ذلك لانى عايز انفذها فعلا
انا اسف مرة تانية و ياريت تعذرونى و تفهمونى

السلام عليكم ورحمه الله وبركاته
أخي العزيز
عدم التفاعل والرد السريع ليس سببه اهمال الأعضاء وانما هي فترة الامتحانات
يعني شغلنا كله المذاكره فقط
وليس عيبا منك انك متحمس لتنفيذ الفكره
ووفققك الله لما فيه الخير

اول حاجة عايز اشكركم جدا انكوا فهمتونى و قدرتوا موقفى
بس احب اوضح حاجة بسيطة
و هى انه مش معنى كلامى انى هسيب فريق رساله حياة
بالعكس انا متحمس كمان جدا للعمل مع هذا الفريق
و دى اكتر هواياتى و هى العمل مع الفرق اللى هدفها افادة الناس بدون مقابل
و بأذن الله هفضل فى فريق رسالة حياة زى مانا
و هكمل فى فريق LeGendZ Team
اللى بكونه و بعمله منتدى و بأذن الله هنفذ الفكرة فيه
و طبعا زى ماقلت يا Mizo مايضرش انى اكون فى اكثر من فريق و بالفعل انا فى اكثر من فريق
وانشاء الله لما اخلص المنتدى اى حد عايز يشارك معايا يقولى و هبعتله دعوة و هيكون شرف كبير اوى ليه

طيب نستفاد منك بقه
كنت عايز اسأل حضرتك سؤال
انت ازاي بترفع الملفات بحيث يتم الضغط عليك تنزل على طول كما تفعل في بعض الملفات والبرامج
وجزاكم الله خيرا

اولا الف شكر على اهتمامك

و انشاء الله اخلص الستايل بأذن الله النهاردة
و هفتح المنتدى عشان يبدأ ينزل فيه مواضيع لانه هيبقى لسه مفتوح وفاضى
و اول مافتحه هبعتلك اللينك
بعد أذن استاذ محمد

و بالنسبة لسؤالك عن طريقة رفع الملفات برابط مباشر
الحكاية ان انا كان عندى موقع قديم فعملتله سكربت مركز تحميل بسيط و خليته يدى روابط مباشرة بحيث انه يدينى رابط الملف نفسه مش رابط الصفحة اللى احمل منها

لكن لو عايز موقع مايخليش الناس تستنى كتير عشان تحمل الملف
جرب www.mediafire.com
موقع حلو اوى اوى اوى و مش بيخليك تستنى مجرد تدوس على
Click Here To Download
بينزلك الملف

و بالنسبة للسؤال بتاع كود الضغط على الصورة
انا عملتهولك على صورة عشان مش هينفع اكتبه عادى المنتدى عربى و الكود هيطلع ملغبط
الصورة :


بدون ترك اى مسافات فى الكود انا سبت مسافات بس للتوضيح

و اى سؤال انا تحت امرك لو اعرفه

رابط الصورة :
http://dc01.arabsh.com/i/00142/24t0b3070e63.jpg

عشان مش هتبان كلمه عشان مساحة الكتابة صغيرة

الفين شكر على الرد وجزاكم الله خيرا
مش عارف اشكر حضرتك ازااا؟ااي

حضرتك تـأمر

وانا كمان معاكم